Nëse BE-ja dëshiron të jetë e besueshme, ajo duhet të kujdeset intensivisht për Ballkanin Perëndimor dhe gjithashtu të mbajë premtimet që ka bërë. Liberalizimi i vizave është një hap i rëndësishëm në këtë drejtim.

Salzburg/Bruksel. Franz Schausberger, kryetar i Institutit të Rajoneve të Evropës (IRE), shprehet i kënaqur me vendimin e Parlamentit Evropian dhe Këshillit për zbatimin e liberalizimit të vizave për Kosovën: “Liberalizimi i vizave ishte një nga shqetësimet kryesore të Kosovës dhe vendi i ka përmbushur të gjitha kërkesat e BE-së, do të thotë që më shumë se sa është kërkuar nga shtetet tjera për këtë temë”, shpjegon Franz Schausberger, duke theksuar: “Nëse një vend i plotëson kërkesat, BE duhet gjithashtu të mbajë angazhimet."

 Kjo është baza e besueshmërisë ndaj qytetarëve në Ballkanin Perëndimor.

Vitet e bllokadave me motive nacionaliste, si kundër Maqedonisë së Veriut, dhe një politikë njoftimesh dhe premtimesh boshe, kanë zhgënjyer shumë njerëz në Evropën Juglindore me Evropën. Schausberger, i cili, ndër të tjera, ishte kryetar i grupit të punës për Ballkanin Perëndimor në Komitetin Evropian të Rajoneve (COR) dhe aktualisht bashkë-kryeson grupin konsultativ Serbi-BE në COR, në vitin 2022 ka bërë thirrje për një "përforcues" për politikën e zgjerimit, e cila duhet të kthehet sërish në një prioritet real të politikave të BE-së.

Kjo do të thotë një hap përpara për të gjashtë vendet e Ballkanit Perëndimor:

• fillimi i negociatave të premtuara prej kohësh me Shqipërinë dhe Maqedoninë e Veriut
• intensifikimi i negociatave me Serbinë dhe Malin e Zi me synimin për të arritur një përfundim të hershëm
• shpalljen e Bosnjë-Hercegovinës dhe Kosovës si vende kandidate
• dhe liberalizimin e vizave për Kosovën

Kryetari i IRE i sheh pozitivisht përpjekjet më intensive të BE-së për të ndërmjetësuar në konfliktin midis Serbisë dhe Kosovës: "Konfliktet në tokën evropiane duhet të zgjidhen nga Evropa pa qenë e varur nga fuqitë joevropiane."

Në të njëjtën kohë, Franz Schausberger u bën thirrje të gjithë liderëve politikë në gjashtë vendet e Ballkanit Perëndimor që të kryejnë të gjitha reformat e nevojshme dhe t'i zbatojnë ato pozitivisht. Këtu përfshihet edhe decentralizimi dhe forcimi i autoriteteve lokale dhe rajonale, pra nivelet që janë më afër qytetarëve dhe që duhet të zbatojnë një pjesë të madhe të kërkesave të BE-së në rast të anëtarësimit në BE.